1877-ЙИСУЗ СИФТЕ ДУСТАГЪ АВУРЛА ЛАГЬАЙ Ч1АЛ

Гьарай эллер, са касдизни текъвез ван
Ччил, цав душман хьана ат1узва аман.

Ччара ийиз хзандивай, к1валивай
Гъурбат жезва заз рик1 алай зи ватан.

Ик1 буьгьтендал русвагь хьана, ажуз хьун?
За вуч ийин? Ччил к1еви я, цав кьакьан.

Рик1ихъ авач сабур, сиве – ширин мез,
Гъил зурзазва, амач такьат, къелем кьан.

Акур бере язух-халкьдин гьалар заз,
Зун галтугиз, захъай катиз. жеда ччан.

Акурлахъди иллаки рик1 куда зи
Яхун Къафар шаз чаз чидай пагьливан.

Пирназаран хажалатар алцумиз
Герек жеда аршин Зуьгьре гъетрев кьван.

Чун гьар са халкь ина тек са хзан я,
Вири сефил, вири сад хьиз я пашман

Вуна, рабби, шикаят чи кьабула,
Ваз чи дуьа, вахъ авайд я чи гуман

Им я минет чи халкьдиз чун халкьай
Адаз атуй чи минетдин язух ван.

Хажалатдин, мусабатдин и селдай
Акъудрай гьар къавмункай тир и хзан.

Ажуз тир Мемнуназ, рабби, куьмек хьухь,
Чара мийир чавай азиз чи ватан.

Гасан Алкадари