А ЗАМАНАДИН ТАКАБУР ЖЕГЬИЛРИЗ

Кьама ялар туна, вун лап дак1вазва,
Акьулдивай заз вун яргъа аквазва.
Тамашариз ви парталриз, зизийриз,
Акьулдиз ваъ, къуллугъ иииз къизилриз.

Намус-гъейрат яргъариз на гадарна,
На рик1елай зегьметчи халкь квадарна.
Мусурманрин дин акъудай пайгъамбар.
Ви патав ваз зат1 аквазвач, темягькар.
Къачагъарин десте хьанва – намус, ар
Терг авуна – аквазмач гьич са гьунар
Тум юзурда куьне гьаким акурла,
Ам хъуьреда кесибди гаф лугьурла.
И зулумар гьи гьал гъиляй къведа куь?
Гьахъ акурла ч1арар цаз-цаз жеда куь.
Факъир, жув хуьх, ахьтйнди ваз такурай
Агъу галай адан хьел ва такьурай.
Я вик1егь сик1, акьван жуьрэт герек туш,
Асландик на хУькуьрмир гьа, ам сик1 туш.
Ахпа вавай, валлагь, ви кьил хуьз жедач
А дамахар вавай мад хъийиз жедач.
Фасад икьраб, ви эхир пуч жеда гьа!
Кьил буш я ви, вални бала къведа гьа!
Аллагьдини ваз гьич рагьим хъийидач
Филдикайни ваз са куьмек жагъидач
Им Мамнуна ваз гузвайди несят я,
Кьил-кьилелай тефин патал меслят я.

Гасан Алкадари